Desjardins

/398/

Supplément¹.

570.

1099, 4 mai.

Urbanus episcopus servus servorum Dei dilecto filio Begoni abbati monasterii sancte Fidis Conchensis ejusque successoribus regulariter substituendis in perpetuum. Ad hoc nos disponente Domino in apostolice sedis servicium promotos, agnoscimus ut ejus filiis auxilium implorantibus efficaciter subvenire et ei obedientes tueri ac protegere, pro ut Dominus dederit, debeamus. Unde oportet nos venerabilibus locis manum protectionis extendere et servorum Dei quieti atentius providere. Igitur tam pro beate virginis Fidis devotione que in tuo requiescere dicitur monasterio quam pro tue dilectionis peticione, ipsum Conchense cenobium, cui disponente Domino presides, apostolice sedis gremio confovendum excipimus. Per presentis igitur privilegii paginam apostolica auctoritate sancimus ut quecunque hodie idem cenobium, vel ex apostolice sedis concessione vel ex bone memorie regum Pipini, Karoli et Ludovici munificentia possidet, sive in futurum concessione pontificum vel liberalitate principum vel oblacione fidelium juste atque canonice poterit adipisci, firma /399/ tibi tuisque successoribus et illibata permaneant. Decrevimus ergo ut nulli ommino hominum liceat idem monasterium temere perturbare, aut ejus possessiones auferre, vel ablatas tenere, vel injuste datas suis usibus vendicare, minuere, vel temerariis vexationibus fatigare; sed omnia integra conserventur eorum pro quorum sustentatione et gubernatione concessa sunt usibus omnimodis profutura. Obeunte te nunc ejus loci abbate vel tuorum quolibet successorum, nullus ibi qualibet surreptionis astucia seu violentia preponatur, nisi quem fratres communi consensu vel fratrum pars consilii sanioris, secundum Dei timorem et beati Benedicti regulam, elegerint. Electus autem a sue diocesis episcopo consecretur, siquidem gratiam atque communionem apostolice sedis habuerit, et si eamdem ordinationem gratis ac sine pravitate voluerit exibere. Alioquin liceat ei vel ad apostolicam sedem recurrere vel catolicum quem maluerit adire antistitem qui nostra fultus auctoritate quod postulatur indulgeat. Idipsum etiam de altarium sive basilicarum consecratione et monachorum qui ad sacros fuerint ordines promovendi ordinatione concedimus. Ad hec adjicimus ut nulli episcoporum facultas sit, sine Romani pontificis licentia, locum vestrum vel monachos interdiccioni vel excommunicationi subicere, nec pro communis diocesis excommunicatione locus ipse excommunicationi vel interdictioni subjaceat. Laicos seu clericos seculares ad conversionem suscipere nullius episcopi vel prepositi contradictio vos inhibeat. Sepulturam quoque ejusdem loci ommino liberam esse decerninus, ut eorum qui illic sepelliri deliberaverint devotioni et extreme voluntati, nisi forte excommunicati sint, nullus obsistat. Porro illam indignam consuetudinem ne ulterius fieri debeat interdicimus, id est ne sanctorum ejusdem monasterii reliquie ad publicos conventus, extra voluntatem fratrum inibi Deo servientium, deferantur. De cella beati Petri que Claravallis dicitur, quam ex jure et concessione sedis apostolice possidetis, manconem aureum per annos singulos Lateranensi palatio persolvetis. Siquis igitur eis crastinum archiepiscopus aut episcopus, imperator aut rex, princeps aut dux, comes, vicecomes, judex, aut ecclesiastica secularisve persona, hanc nostre constitutionis paginam sciens, contra eam temere venire temptaverit, secundo terciove commonita, /400/ si non satisfactione congrua emendaverit, potestatis honorisque sui dignitate careat reumque se divino judicio existere de perpetrata iniquitate cognoscat, et a sacratissimo corpore ac sanguine Dei et domini redemptoris nostri Jhesu Christi aliena fiat, atque in extremo examine districte ulcioni subjaceat; cunctis autem eidem loco justa servantibus sit pax domini nostri Jhesu Christi, quatenus et hic fructum bone actionis percipiant et apud districtum judicem premia aeterne pacis inveniant, amen.

Scriptum per manum Petri notarii regionarii et scriniarii sacri palatii. Bene valete. — Dans le champ d’un cercle: Sanctus Petrus. Sanctus Paulus. Urbanus papa II; et en legende à l’entour du cercle: Benedictus Deus et pater domini nostri Jhesu Christi. — Datum Rome apud beatum Petrum per manum Johannis sancte Romane ecclesie diaconus cardinalis, iiii nona maii, indictione vii, incarnationis Dominice anno mxcix, pontificatus autem domini Urbani secundi pape xii.